NAGA CITY- Nagin matrayumpo an pigkundusir na 33rd Asia Pacific Regional Scouts Jamboree.
Sa entrevista kan Bombo Radyo Naga ki Giefe Terana Institutional Commissioner, Boy Scouts Masbate Council sinaysay kaini na nagin matrayumpo an Jamboree huli ta pinagsararo kaini an maabot sa 25,000 scouts kan Asia Pacific Region.
Pigpatotoohan man ni Terana na bako sana ini basta pagtiripon kundi sarong selebrasyon kan Unity asin Values huli ta ini man talaga an obheto kan Scouts.
Kaibahan digde an mga aktibidad siring kan Cultural Exchange, Cultural Nights, asin nagkaigwa man nin Internation Nights.
Panduwang aktibidad an Leadership Skills and Development siring kan survival skills, environmental programs, community service asin team building na pinagsaro an mga paratukdo asin mga scouts tanganing mas ma-uswag an leadership komo sarong youth.
Igwang mga representantes an bilog na Bicol Region asin nagpuon ini kan December 14 hasta December 20.
An Jamboree, sarong dakulang gatherings kan mga scouts sa manlaen-laen na lugar o nasyon tanganing magbilog nin friendship, learning asin adventure.
Ini man sarong paagi tanganing maaraman an manlaen-laen na kultura kan ibang lugar o nasyon.
An aktibidad na ini pig-aatendiran bako sana kan mga estudyante magin man kan mga nasa simbahan asin mga nasa pribadong sektor.
Pigheras man ni Terana na an adal na nakua kaini sa aktibidad iyo an nahubog nin marhay an global citizen kan mga kaakian asin naisabuhay kan mga scouts an values digde.
