NAGA CITY – Nag-kokontrol na sa pag-ako nin mga nagigin stall owner sa merkado an pamayuhan kan Ocampo Public Market.
Sa entrevista kan Bombo Radyo Naga ki Eduardo S. Jallores Jr. Designated Market Administrator kan Ocampo Public Market sinaysay kaini na dakol pa an mawot mag apply sa merkado alagad mahihiling na kulang na espasyo kaya nagkokontrol na an opisyal sa pagtugot sa mga paratienda.
Sa ngunyan igwang 200 na stall an nasa Public Market alagad pigsierto man ni Jallores na kun marhay an mahiling na an kalinigan sa Merkado pupwede na mapokusan an mga nag-aapply.
Paliwanag man kaini na dapat igwang marhay na sectioning an pwesto asin dapat mahiling na bakong crowded, kaya igwang mga paghihigot na ginigibo sa mga mawot magtinda.
Sa ngunyan kamawotan kan opisyal na maipakarhay an kahewasan kan nasambitan ng merkado publiko.
