NAGA CITY- Ikinaogma kan Philhealth Bicol an desisyon kan Supreme Court na ibwelta sa ahensiya an nasa P60 bilyong sobrang pondo.
Sa entrevista kan Bombo Radyo Naga ki Leri Ilagan, Head kan Public Affairs Unit kan Philhealth Regional Office V, sinaysay kaini na saindang pigrerespeto an nagin desisyon kan Korte Suprema.
Sigun ki Ilagan, ini an patotoo asin rekognasyon na naitatao kan korporasyons sa mga miyembro kaini.
Marurumduman, pigsugo kan Korte Suprema an gobierno na ibalik sa Philippine Health Insurance Corporation (PhilHealth) an P60 bilyong sobrang pondo na naenot naman na naibalyo sa national treasury.
Tanganing masierto na maibabalik an pondo, kaibahan sa kasuguan kan mga mahistrado na ibali an nasambitan ng kantedad sa 2026 General Appropriations Act (GAA).
Sa 136-pahinang desisyon, pigdeklarar kan SC En Banc na mayong bisa an Special Provision 1(d), Chapter XLIII kan 2024 GAA, an Finance Circular No. 003-2024, asin an pagbabalyo kan P60 bilyon huli ta pigpautob man soboot an mga ini na igwang labi na pag-abuso sa kapangyarihan na katampad kan kawaran o sobrang hurisdiksyon.
Pigtutugutan man kan nasambitan ng Special Provision an pagbabalik kan sobrang pondo kan mga government-owned o controlled corporations sa national treasury, mantang pigsugo man an circular kan Department of Finance (DOF) an pagbalyo kan kabilugang P89.9 bilyon gikan sa PhilHealth pasiring sa national treasury.
Komo kasimbagan kan PhilHealth sa kasuguan kan DOF, naenot naman na pigbalyo sa national treasury an P60 bilyon na parte kan P89.9 bilyon.
Sa ngunyan, pigsierto na sana kan opisyal na padagos an saindang ginigibong mga programa tanganing mamatean kan publiko an benipisyo na pigtatangro kan korporasyon.
