Dakol pang tawo an pigtutubudan na binawian nin buhay na asin labi 100 an lugadan makalihis mangyari an sarong kasulo sa sarobf bar sa ski resort sa Crans-Montana, Swiss Alps, mantang pigseselebrar an pagsabat sa Bagong Taon, Enero 1, 2026.
Sigun sa Cantonal Police of Valais, nagkaigwa nin makusog na pagsabog huli sa nangyaring kasulo, alagad mayo man indikasyon kan terorismo sa lugar.
Dakol sa mga lugadan nagtamo kan malalang paso.
Huli digde napiritan nang magdeploy nin 10 helicopter, 40 ambulansya, asin 150 rescue personnel an mga awtoridad tanganing tugunan an insidente.
Sigun sa report dae natukdo kan mga awtoridad an pinuunan kan sulo asin sinabi na bakong “explosive device” an kawsa kan makusog na pagsabog.
Apwera digde mayo pang kumpirmadong impormasyon an mga awtoridad dapit sa nasyonalidad asin pagkakakilanlan kan mga biktima.
Napag-araman na bistado an bar komo popular sa mga turista.
Sa ngunyan presenteng pigsarado kan pulisya an lugar, asin nagtakda man nin no-fly zone.
Pigtabangan man kan mga awtoridad an mga pamilya na mabisto asin maibwelta an mga lawas kan biktima komo respeto sa mga ini.
