Nagpakol na sa labi 500 katawo an kumpirmadong binawian nin buhay sa mga serye kan hiro protesta sa Iran.
Basado sa pinakabagong datos gikan sa mga aktibista gikan sa laog asin luwas kan Iran, pigreport kan US-based human rights group na HRANA na naberipika na kaini an pagkagadan kan 490 protesters asin 48 security personnel mantang labi 10,600 katawo man an inarestar sa laog kan duwang semanang kariribokan sa nasambitan ng nasyon.
Alagad sa ngunyan, mayo pang pigluluwas na opisyal na datos gikan sa gobyerno kan Iran.
Sa state television kan Iran, pinahiling an dose-dosenang bags kan mga lawas na nasa ground kan coroner’s office sa kabisera kan Tehran, kun saen napamareta digde na an mga binawian nin buhay iyo an mga biktima kan insidenteng kagibuhan kan mga “armadong terorista” siring man pigpahiling sa footage an mga mahal sa buhay kan mga biktima na naghahalat sa luwas kan Kahrizak Forensic Medical Centre sa Tehran mantang pighahalat an matukoy an pagkakakilanlan kan mga lawas kan biktima.
Ikinabigla man ni UN Secretary-General Antonio Guterres an mga report dapit sa kadahasan kan mga otoridad kan Iran asin nangapodan para sa maximun restraint asin pighurot an bilog na pagrespeto asin pagprotehir sa mga derechos kan mamamayan para sa kalayaan kan pagpapahayag, asosasyon, asin matoninong na pagtitiripon-tipon.
Kan nakalihis na semana, pigdeklarar kan mga otoridad sa Iran an tolong aldaw na national mourning komo pagtataong-pugay sa mga biktima na inapod na “martyrs” na nagadan sa saindang pagtutol kontra sa Amerika asin Zionist regime.
Marurumduman, nagsiklab an mga hiro protesta sa Iran kan nakalihis na Disyembre 28, 2025 komo pagpapahayag kan kaangguta sa krisis sa saindang ekonomiya huli sa record-high inflation, halangkaw na presyo kan mga pagkakan, asin pagbagsak kan kantidad kan rial. Marekas na naghewas an mga protesta hasta sa ipangapodan an mga pagwawakas kan presenteng regime, na namamayo puon pa kan taong 1979 Islamic Revolution.
Inakusaran man kan Iranian authorities an US asin Israel na nagpapalala kan kariribokan sa saindang nasyon asin nangapodan nin nationwide rally tanganing kondenaron an soboot teroristang aksiyon na pigpapangenotan kan Amerika asin Israel.
Puon man kan nakalihis na Huwebes, Enero 8, naputol an bulos kan impormasyon gikan sa Iran huli sa internet blackout.
Nagpatanid man an Iran sa Amerika na saindang tatargeton an US military bases enkaso magpatanid si US President Donald Trump na manghimasok sa ngaran kan mga protester sa Iran.
