Nagpakol na sa labi 2,000 na katawo an numero kan naireport na nagadan sa mga serye kan hiro-protesta sa Iran, sigun sa sarong human rights group.
Basado sa report gikan sa Human Rights Activists News Agency (HRANA), kabilogang 1,850 protesters an kumpirmadong nagadan, 135 security forces asin siyam na sibilyan siringman may siyam na aki na binawian nin buhay sa nakalihis na 17 aldaw.
Sigun man sa Iranian official, nagadan soboot an 2,000 katawo kun saen an mga terorista an pigbasol na may kagibo.
Kan Martes nin bangge, oras sa Amerika, nakipag-ulay si US President Donald Trump sa top officials para pag-ulayan an dapit sa isyu sa Iran asin nagpromisang makalap nin tamang datos manungod sa death toll sa Iran. Sa oras na makua kan US President an kabilogan na numero kan nasawi, saka ini magibo nin karampatang aksiyon.
Enot nang nagbanta si Trump na mabayad nin dakula an Iranian authorities para sa mga paggadan asin pig-enkaminar an mga namamanwaan na ipagpadagos an pagpoprotesta.
Naenot naman pigkanselar ni Trump an gabos kan pag-urulay sa mga opisyal kan Iran hasta mag-untok an mayong kabuluhang paggadan sa mga protester asin pigsierto na papaabot na an tabang para sa namamanwaan kan Iran na pig-aapod kan US President komo “MIGA,” na buot sabihon na Make Iran Great Again.
