Nagluwas nin Maritime Safety Advisory an Philippine Coast Guard (PCG) makalihis na mairehistro an ribu-ribong pasahero asin ginatos na rolling cargoes na na-stranded sa manlaen-laen na pantalan sa Visayas asin Mindanao ngunyan na Enero 15, 2026.
Sa Eastern Visayas, kaibahan sa mga apektadong pantalan sa San Juan, Saint Bernard, Benit, Magallanes/Triana, Padre Burgos, Maasin, Sta. Clara, Dapdap, Looc, asin Bato kun saen 992 pasahero, 298 rolling cargoes, asin 5 vessels an na-stranded.
Sa Bicol Region, nairehistro sa Castilla, Pilar, asin Masbate ports an 323 pasahero, 129 rolling cargoes asin 6 vessels na dae nakabiyahe.
Mientrastanto, sa Bicol Region, kaibahan an Eva Macapagal, Lipata, asin Hayanggabon ports na nagreport nin 473 pasahero asin 146 rolling cargoes na na-stranded.
Apwera digde, 11 vessels an presenteng nagtatago o taking shelter tanganing makalikay sa maraot na panahon.
Sa kabilogan, 16 na pantalan an apektado kan bagyo na nagresulta sa 1,788 pasahero, 573 rolling cargoes, asin 11 vessels na na-stranded, mantang 11 vesels man an paramientras na nakakubli.
Sigun sa PCG, padagos an saindang pagbabantay asin koordinasyon sa lokal na gobyerno tanganing masierto an kasalbaduhan kan mga biyahero asin crew.
Pigpapatanidan man an publiko na likayan muna an paglalayag mantang nagtitinir na aktibo an Tropical Depression Ada sa Philippine Sea.
