NAGA CITY- Nagtitinir na manageable an sitwasyon sa may parte kan San Jose Partido Camarines Sur sa ibong kan makusog na pag-uran huli sa Bagyong Ada.
Sa entrevista kan Bombo Radyo Naga ki Mayor Jerold Peña kan San Jose Camarines Sur, sinaysay kaini na amay na naabisuhan an mga tawo huli sa saindang bagong installed na monitoring system na kun saen nagtataong impormasyon sa kamugtakan kan panahon.
Sigun pa ki Peña, mayo man pig-ibakwar sa saindang banwaan asin sulamenteng transportasyon sana an problema sa may parte kan Minoro, Kinalansan asin Sabang.
An nasambitan ng mga barangay an prone sa pagbaha kaya padagos man na pigbabantayan.
Apwera digde, yaon man an saindang mahigot na pagmonitor sa may parte kan Rangas River huli ta nagkakaigwa nin soil erosion sa lugar tuyong may kalamidad o makusog an pag-uuran huli naman sa haloy nang problema an pag-abot sa quarrying.
Dugang pa ni Peña, active an saindang MDRRMO asin 24/7 na nakabantay sa kamugtakan kan panahon.
Mientrastanto, sa presente igwang mga bagong lakdang na pigbibilog an alkalde tanganing magin preparado an gabos na barangay sa panahon kan kasiributan sa paagi kan bago man na mga ekipahe.
Sa ngunyan, hagad na sana kaini an kooperasyon kan saindang mga nasasakupan tanganing magin salbado an gabos sa huma na dara kan Bagyong Ada.
