Piglalaoman kan Department of Justice na posibleng magpakol nin labi sarong bilyon asin kabangang piso an kantidad kan kwarta na ibabalik kan mga testigo kan estado o state witness sa kaso kan flood control.
Sigun ki Justice Usec. Nicholas Felix Ty, ini kun masusunod an kasunduan kan kagawaran sa pagultanan kan mga ini sa irarom kan ‘Witness Protection Program’.
1.5 billion Pesos an makukua kan gobierno na ibabalik kan apat na naitalagang ‘state witnesses’ sa flood control projects anomaly cases.
Sa presente, igwang apat na piganunsiyar an Department of Justice sa kun siisay an matindog asin napiling ‘state witness’ para sa mga kaso.
Ini sinda former Department of Public Works and Highways Undersecretary Roberto Bernardo, Henry Alcantara, Gerard Opulencia asin kontratistang si Sally Santos.
Puon sa piglaomang bilog na kantidad kan ibabalik na kwarta, an sarong bilyon digde gikan ki former Usec. Bernardo.
Kan nakalihis na Martes nagbalik na ini nin 35 million pesos komo kabayaran sa napagkasunduan 150-million pesos na restitution.
Alagad sigun sa kagawaran, promisa kaini na mapakol sa 1-bilyon piso kantidad man an kabilogang kwarta ire-restitute ni Bernardo.
Pig-anunsiyar ni Justice Secretary Fredderick A. Vida na mapakol sa P316, 381, 500 an kabilogang kantidad na nakolektar o naiturn-over kan ‘restitution money’ gikan sa maanomalyang flood control projects.
Dugang ini sa mga pigheras na mga ebidensya kan mga ‘state witness’ tanganing mabilog nin husto an mga kasong pigsunad sa korte.
Pigsierto man kan nasambitan na sekretaryo na an gabos kan mga nareseber na pigbalik na kwarta dokumentado o may resibo. Makalihis maiturn-over sa kagawaran, pigdara na an milyun-milyon kantidad kan kwarta sa Bureau of Treasury.
Kaya pigtawan duon ni Justice Secretary Vida na bako ini an kabilogan alagad piglalaoman pang madudugangan sa maabot asin masunod na panahon.
