Mantang padagos na nagbubuhat an kinaban gikan sa epekto kan pandemya kan Covid-19, nangapodan an mga health experts nin mas halangkaw na lebel kan paglilikay sa tahaw kan pagdakol kan kaso kan influenza A na pigkokonektar sa marekas na paglakop kan H3N2 subclade K variant, na pig-aapod kan nagkapira komo “superflu.”
Nilinaw kan mga health authority na an “superflu” an bako ng bagong helang asin bako man opisyal na terminong medikal, kundi sarong apod na piggamit kan media tanganing iladawan an sarong klase kan seasonal influence A (H3N2) na mas halangkaw an paglakop ngunyan na flu season.
Sigun sa mga report gikan sa United States, United Kingdom, Europa asin pirang parte kan Asya, naglangkaw an hawaan kan trangkaso na igwang koneksiyon sa nasambitan ng subvariant, na posibleng bahagyang nakakaiwas sa immunity gikan sa dating impeksiyon o bakuna.
Sa Pilipinas, kinumpirmar kan Department of Health (DOH) asin iba pang local surveillance systems an paglangkaw kan mga kaso kan influenza A (H3N2) subclade K sa manlaen-laen na parte kan nasyon.
Siring man, pighurot kan mga opisyal na kadaklan sa mga pasyente an nagrarahay, asin mayo pang nairerehistrong bakong pangkaraniwang paglangkaw kan numero kan mga nagagadan.
Pigtawan-duon kan mga eksperto na nagtitinir na importante an mga batayang lakdang sa salud kan publiko na napatotoohang epektibo kontra sa mga helang sa paghangos.
Kaibahan digde an madalas na paghuhugas nin kamot, tamang cough etiquette, pagsusulot nin mask kun igwang sintomas, asin paglikay sa pakikisalamuha kun igwang helang.
Alagad maski hinali na an kadaklan sa mga mask mandate, padagos na pigrerekomendar kan mga eksperto an pagsusulot nin mask kun igwang helang o nasta matawong indoor areas, siring kan mga merkado, simbahan asin pampublikong transportasyon.
Nangapodan man an mga otoridad nin amay na pag-konsulta sa doktor, orog na para sa mga senior citizen, immunocompromised individuals, asin igwang mga underlying health conditions, tanganing malikayan an posibleng komplikasyon.
Liwat na pighurot kan World Health Organization (WHO) na an bakuna kontra sa trangkaso an nagtitinir na importanteng sandata.
Sigun sa WHO, maski igwang pagkakaiba an circulating viruses sa mga strain na nasa bakuna, nakakatabang pa man soboot ini sa paglikay sa malubhang sintomas asin komplikasyon, orog na sa mga high-risk group.
