NAGA CITY – Padagos an pangapudan kan Gainza MPS sa ina kan nadukayang mayo na nin buhay na umboy sa Bicol River na sakop kan banwaan nin Gainza kan nakalihis na Enero 20, 2026.
Sa entrevista kan Bombo Radyo Naga ki PCPT Sheralyn Samonte – Chief of Police kan Gainza Municipal Police Station sinaysay kaining pasado alas tres nin hapon kan Enero 20, 2026 kan may magpasiring sa saindang himpilan para ipaaram an nasambitan na insidente.
Nahiling an mayo na nin buhay umboy na palutang-lutang sa Bicol River pasiring sa banwaan kan Gainza partikular samay parte kan Barangay District II (Poblacion).
Padagos man an pigsasagibong imbestigasyon kan mga otoridad tanganing matukdo na an pagkakabisto kan Ina asin kun paano napaduman sa siring kaidtong kamogtakan an umboy.
Nailubong naman an umboy sa Gainza Catholic Cemetery sa tabang kan LGU Gainza, asin pigbasbasan man ini antes ihatod sa huring hantungan.
Basado man sa inisyal na imbestigayon an umboy bagong pangaki pasana huli ta nakua ini yaon pa soboot an saiyang medical record alagad state of decomposition na kan makua ini huli ta haloy nang nababad sa tubig.
Mientrastanto, sa ngunyan pighahalat pa man an resulta kan autopsy.
Pangapudan man ni Samonte sa mga nakakabisto sa pamilya o Ina kan umboy na ipaaram man sa sainda tanganing malinawan man kun tano nag-abot sa siring kaidtong pangyayari.
Siring man mawot man kaining ipaaram sa sainda na naisaayos na an paglubong sa umboy asin makipag-ugnayan sa sainda enkaso mawot ninda mahiling an puntod kan umboy.
