Nagbwelta si Senator Rodante Marcolete ki Senate Blue Ribbon Committe Chair Panfilo Lacson kasunod kan pigluwas kan minorya kan Senado na ‘Minority Report’.
Enot kayang inapod ni Sen. Ping na sarong lehislador sa Blue Ribbon Committe asin sa halangkaw na kapulungan an ginibo kan minorya na pagluwas kan nasambitan na report, orog na dae pa nakakapagluwas an nasambitan na komite nin sadiring committe report.
Pigtawan duon pa ni Lacson na an pinakamainam na lugar para sa nasambitan na report an pasiring sa basurahan.
Sigun man ki Sen. Marcoleta, dapat basahon muna kan Blue Ribbon chair an laog kan nasambitan na report antes kaini apudon na basura.
Katwiran kan Senador, bakong maraot an ginibo nindang pagluwas nin report, orog na dae pa nagluluwas an nasambitan na komite kan sadiring report, huli ta dati nang nagpromisa an chairman na maluwas nin partial report.
Hapot kan Senador, nuarin makakahiling an mga Pilipino kan aktwal na kopya kan report kan Blue Ribbon Committee, kun saen pirang hearing na an naisagibo puon pa kan nakalihis na taon.
Paliwanag pa kan Senador, an pagluwas kan minorya kan sadiri kaining report tanganing ibusol an komite na magluwas man nin partial report makalihis an halabang serye kan mga pagdangog.
Pigbweltadahan man ni Marcoleta an enot na tolong hearing na saiyang ginibo sa laog kan halipot na panahon na ini nagin chairman kan makapangyarihang komite.
Sigun sa saiya an laog kan minority report gikan sa tolong pinakainot na hearing na saiyang pigtukawan asin sa tolong nagsunod na hearing na pinangenutan ni Sen. Lacson komo nagsunod na chairman.
Kun ikokonsederar ni Sen. Lacson na basura an nasambitan na report, sinaysay na man kan saiyang kapwa Senador na basura an enot na tolong pagdangog na saiyang pinangenutan.
