Nakatalaang pag-urulayan sa masunod na semana an ethics complaint kontra ki Dasmarinas Cavite Rep. Kiko Barzaga.Ini an kinumpirmar ni House Committee on Ethics and Privileges Chairman Rep. JC Abalos.
Sinaysay ni Abalos na aabisuhan si Cavite 4th District Rep. Kiko Barzaga asin tatawan nin tyansang madangog an saiyang kampo sa pigtalaang pagdangog kan komite sa masunod na semana.
An pagdangog an konektado kan privilege speech na pigsunad ni Manila 2nd District Rep. Rolando Valeriano kan nakalihis na Martes, kun saen nangapodan ini nin mas magabat na padusa kontra ki Barzaga huli sa soboot padagos na pagbalgar sa House Rules.
Marurumduman na kan nakalihis na Disyembre, ipinataw an 60-aldaw na suspensiyon ki Barzaga huli sa soboot “disorderly behavior.”Sigun ki Abalos apwera ki Barzaga, kadakol pang miyembro kan Kamara an nahahampang sa ethics complaints.
Nagsayuma man si Abalos na ibunyag an mga ini huli ta ini an confidential.Simbag ini ni Abalos makalihis na haputon kun igwang nagsunad ni ethics complaint kontra ki Batangas Rep. Leandro Leviste.
Mientrastanto, nilinaw ni Abalos na posibleng mas magabat pang padusa an kahampangon kan mga lehislador, orog na kun padagos sindang mabalgar asin dae magsunod sa pigtalaan na mga panundonan.
Sigun sa saiya, dae natatapos sa simpleng suspension an pwedeng ipataw na padusa.
An pinakamagabat na kapadusahan na pwedeng ipataw sa sarong miyembro kan Kamara iyo an dagusang pagpapatalsik o expulsion gikan sa House of Representatives.
Siring man, pigtawan-duon ni Abalos na dae sakop kan kapangyarihan kan Komite an magrekomenda nin perpetual disqualification o habambuhay na pagbabawal sa pagkapot kan anuman na posisyon sa gobyerno.
Igwang malinaw na limitasuon soboot an mandato kan Komite asin nakatuon sana ini sa mga padusang pigtutugotan sa irarom kan nag-iiral na mga patakaran kan Kamara.
