Handa an House Prosecution Panel na atubangon asin siyasaton an mga testimonya, ebidensiya, asin argumento na ipapaabot kan defense team ni Bise Presidente Sara Duterte mantang mabalik an impeachment trial sa Senado sa Nobyembre 9.
Sa intrevista kan Bombo Radyo Naga ki Rep. Renee Co, House Prosecution Spokesperson, Kabataan Partylist, sinabi kaini na padagos an saindang pag-aadal asin pagrepaso kan mga Articles of Impeachment asin mga dokumento na isinumitir bilang ebidensya ngani na ihanda para sa mga posibleng depensa kan lado kan bise presidente.
Tinawan- doon ni Co na preparado an prosecution panel na magkondusir nin cross-examination sa mga testigo na iprinesentar kan depensa tanganing maaraman an mga posibleng inconsistencies sa saindang mga testimonya asin masimbag an mga argumento na ipapaabot sa panahon kan pagbista.
Pig-eksplikar man ni Co na an impeachment proceedings nakasentro ngonian sa Article II, na may kinaaraman sa suboot dae maipaliwanag na yaman ni Duterte. Kabale sa mga evidencia na saiyang sinitar iyo an Statement of Assets, Liabilities and Net Worth (SALN), mga dokumento gikan sa manlaen-laen na ahensya kan gobyerno, asin mga record sa bangko na sinabi niyang may relasyon sa mga transaksyon pinansyal kan bise presidente asin kan saiyang agom.
Nanindugan an mambabatas na kaipuhan na ipaliwanag kan lado ni Duterte an mga alegasyon, mantang piglalaoman kan prosecution panel na magpresentar nin sadiring evidencia asin counter-arguments an depensa. An siring na mga pahayag iyo an paninindugan kan panel kan prosekusyon asin bako pang pinal na hatol kan korte nin impeachment.
Mientrastanto, pigkwestyon man ni Co an pagdolok kan defense team sa Korte Suprema mantang padagos pa an proseso kan impeachment sa senado. Segun saiya, dapat igalang an awtoridad kan Senate impeachment court na mag-oversee kan trial sagkod na matapos ini, dawa ngani inako kaini na pwede ining mag-apelar sa Korte Suprema kun igwa nin basehan, arog kan alegasyon nin grabeng pag-abuso sa diskresyon na nagigin kawsa kan kawaran nin hurisdiksyon.
Dugang pa ni Co na preparado an prosecution panel na simbagon an mga legal na isyu na posibleng ipresentar kan depensa sa Korte Suprema, siring man an mga mosyon asin argumento kaini sa impeachment court.
Nangapudan an mambabatas sa publiko na padagos na bantayan an mga maabot na hearing asin iba pang importanteng proseso kan gobyerno, asin magpartisipar sa pagtulod kan accountability asin transparency sa mga opisyales kan gobyerno.
