Nagtao nin emosyonal na tribute si Home Alone star Macaulay Culkin sa saiyang on-screen na ina na si Catherine O’Hara sa sarong Instagram post kaini makalihis na bawian nin buhay an batikang aktres sa edad na 71 huli sa helang.
Labi an nagin pagmundo kan mga fans asin kaparehas kaining artista sa pagkagadan ni Catherine, na nagganap komo si Kate McCallister, ina kan karakter ni Macaulay na si Kevin, sa mga pelikulang Home Alone (1990) asin Home Alone 2: Lost in New York (1992).
Apwera sa Home Alone, pinadangat man si Catherine kan bagong henerasyon kan mga paradalan sa saiyang papel komo si Moira Rose sa hit TV series na Schitt’s Creek, na nagdurar nin haros anom na season puon 2015 hasta 2020.
Marurumduman kan 2023, liwat na nagkahilingan sinda Macaulay asin Catherine sa seremonya kan Hollywood Walk of Fame, kun saen pinarangalan si Macaulay kan saiyang sadiring star.
Si Catherine an nagtao nin mensahe asin pig-omaw an aktor kun saen sinaysay na an trayumpo kan Home Alone an huli sa talento asin sense of humor ni Macaulay.
Sa saiyang patara-tara kaidto, pigsaladawan ni Catherine si Macaulay komo sarong magayon na 10-anyos na aki nin huli ta nakaya kainining hampangon an gabat kan kasikatan sa joven na edad.
Tinapos kaini an saiyang mensahe sa pagsasabing, “I’m so proud of you.”
Sigun pa ki Macaulay, maski sa mga nagsunod na taon, pig-aapod pa man giraray kaini si Catherine komo“Mom,” asin pig-apod man ini kan aktres na “Son.”
Mientrastanto, nagpa-abot naman nin pakikidumamay an mga tagahanga sa comment section kan post ni Macaulay asin kadakol pa an nagpahayag kan saindang pasasalamat sa ambag ni Catherine O’Hara sa kinaban kan pelikula asin telebisyon.
