Pigbubusol kan Senate Committee on Social Justice, Welfare, and Rural Development an mahewasang reporma sa pagheheras nin ayuda kan gobyerno, kaibahan an pagbawas sa mga dokumentong pighahagad asin pag-ulang sa pakikiaram kan mga pulitiko sa proseso.
Sa pagdangog kan komite, sinaysay ni Chairperson Senador Erwin Tulfo na obheto kan prosopwestong ley na gibuhong permanente an Assistance to Individuals in Crisis Situation (AICS) kan Department of Social Welfare and Development (DPWH), asin sabay na pasimplehan an paagi kan pagkua nin tabang.
Sa irarom kan prosopwesto, duwang primerong dokumento na sana an kakaipuhanon kan mga benepisyaryo, partikular sa medical assistance:sarong valid ID asin kaukulang hospital bill o medical record.
Target kaining halion an mga requirement siring kan ertificate of Indigency, barangay clearance, notarized affidavit, Social Case Study Report, asin magin marriage certificate sa pirang klase kan tabang.
Sigun sa senador, an presenteng sistema an bako sanang maluya kundi nagigin dalan man sa pamumulitika, huli ta napipiritang mag-ago an mga nangangaipuhan sa barangay para sa indigency certificate—sarong dokumentong madalas igwang pangaran asin ladawan kan mga lokal na opisyal.
Binanggit kan komite na an siring na sistema an nagbubugtak sa mga benepisyaryo sa alangain, orog na tuyong panahon kan eleksiyon, kun kasuarin nagigin sensitibo an pagheheras nin tabang-pinansiyal.
Kinumpirmar man kan DSWD na kun naisaley an prosopwesto, plano kaining iangat an AICS komo sarong suhay na bureau tanganing mapamarhay an pamamahala, staffing, asin implementasyon kan programa sa bilog na nasyon.
Kasabay kaini, pig-enkaminar ni Tulfo an Department of the Interior and Local Government (DILG) na parekason an mahigot na pagpapautob kan mga panundonan na nagbabawal sa presensiya kan mga pulitiko sa pagheheras nin ayuda, alinsunod sa 2026 General Appropriations Act.
Mientrastanto, komo kasimbagan nagluwas an DILG nin Memorandum Circular No. 2026-066 na tahasang nagbabawal sa pagbubugtak nin pangaran, o anumang pagkakakilanlan kan mga opisyal kan gobyerno sa mga programang pigpopondohan kan pambansang gobyerno.
