Mahigot na binabantayan kan Incident Management Team (IMT) an pagdagsa kan mga nagmomondo asin bisita sa mga kamposanto sa Ciudad nin Naga ngonian na Undas 2026 para masiguro an seguridad, seguridad asin orden kan publiko.
Sa intrevista kan Bombo Radyo Naga ki Christopher Jhun D. Zantua, Public Information Officer, Emergency Operations Center-Incident Management Team, sinabi kaini na labi sa 200 na personahes hale sa manlaen-laen na ahensya asin volunteer groups an nadeploy sa mga sementeryo, memorial park, simbahan asin terminal sa ciudad.
Kabale sa mga pig-iimplementar na lakdang iyo an traffic management, one-way traffic scheme, police visibility, medical assistance asin pagmukna nin help desk para sa mga nawawarang aki asin iba pang nangangaipo nin tabang.
SEgon ki Zantua, mantenidong manageable an bulos kan trapiko asin mayo pang nairehistrong mayor na insidente. An bilang kan mga bisita piglalaoman na madudugangan poon alas 3 nin hapon. sagkod sa banggi, partikularmente sa mga pampublikong sementeryo.
Piggigibo man an situational monitoring kada tulong oras sa tabang kan CCTV cameras asin drone surveillance para tulos na mabisto asin matawan nin aksyon an anuman na insidente.
Nagpagirumdom an IMT sa publiko na magbiyahe nin amay, magdara nin payong asin magkakanigong proteksyon kontra sa init, bantayan an mga kaakian, asin papagdanayon na malinig asin areglado an mga kamposanto.
Naglalaom an IMT na magigin ligtas asin matoninong an pagromdom kan Undas ngonian na taon.
