Nagpakol sa P9.33 billion an kabilugang kita kan National Telecommunications Commission (NTC) kan 2025, na mas orog na halangkaw kaysa sa pigtalaan na target kan ahensya.
Pigsaysay kan NTC na an nakolektar na kita kan nakalihis na taon an nag-abot sana P2.709 billion o poco mas o menos 41% na mas halangkaw kumparar sa target na P6.622 billion.
Sigun ki NTC Commissioner Ella Blanca Lopez, an positibong revenue performance kan ahensya an bunga kan pinapusog na regulatory compliance sa sektor kan telekomunikasyon.
Pigkokonektar man ni Lopez an paglangkaw kan koleksyon sa mas mahigot na pagpapautob kan mga regulasyon, pinamarhay na collection efficiency, asin sa padagos na pag-uswag kan industriya kan telecommunications.
Pigsaysay kan komisyon na an gabos kan nakolektar na kita an direktang pigsusumiter sa Bureau of the Treasury, na ginagamit tanganing pondohan an manlaen-laen na programa kan gobierno, kabali na an Free Wi-Fi Program kan Department of Information and Communications Technology (DICT).
An NTC an nagmamanehar asin nagreregula sa mga cable asin commercial television operators, broadcast radio stations, telecommunications companies, radio operators, internet access service providers, asin iba pa katakod na serbisyo sa nasyon.
