OBLIGADONG magparehistro sa opisina kan Department of Trade and Industry an mga taong nagpa-plano na magtugdok nin negosyo.
Ini an pigpaliwanag kan pamayuhan kan DTI-Camarines Sur. Sa entrevista kan Bombo Radyo Naga kay Jay Percival Ablan, Provincial Director kan DTI-Camarines Sur, kaipuhan talagang iparehistro an negosyo sa DTI huli ta enot ini an nasasaad sa ley, tanganing maging legal an pangaran asin operasyon kan business entity.
Sigun pa ki Ablan, an saro pa sa mga rason kun tano kaipuhang iparehistro an negosyo, iyo an tanganing malikayan an mga dae nilalaoman na pangyayari siring kan pag-arog sa pangaran asin produkto asin panloloko na pwedeng mapuli sa kaso.
Huli digdi, pig-enkaminar ni Ablan an gabos na mga nagbabalak na mag-establisar nin negosyo, gurano man kadakula o kasadit na eparehistro tulos sa DTI an saindang entity tanganing magin legal an bilog na operasyon.
