PIGDEKLARAR na working holiday an petsang February 25, 2026. Mawot sabihon, nagtitinir na igwa nin regular na laog an mga obrero sa gobyerno kabali na an mga teaching and non-teaching personnel kan DepEd, magin an estudyante, pigkokonsidera na igwa nin regular na klase.
Sa entrevista kan Bombo Radyo Naga ki Atty. Salvador Bogs Pelingon, Division Information Officer kan Department of Education-Camarines Sur, sinaysay kaini na maski na gustuhon kan namamayo sa eskwelahan na suspendiron an klase komo pagkomemorar sa EDSA People Power Revolution, dae soboot ini pwedeng gibuhon.
Nin huli ta, igwa sana nin jurisdiction an mga principal asin head teacher na magsuspinder nin klase kun may mga huma nin bagyo o ano pa amn na kalamidad o katibaadan. Alagad sa arog kaining mga sitwasyon, dapat na utubon kun ano an mandato kan otoridad.
Pigheras pa ni Pelingon, an an saindang partisipasyon sa pagkomemorar sa EDSA People Power Revolution, iyo an sa paagi kan integration asin pag-iba sa curriculum an pagtutukdo o pagkokundusir nin mga aktibidad na may kinaaraman sa pag-anduyog asin pagpapauswag sa tunay na diwa kan okasyon na ini.
Pwede suboot iiba kan mga paratukdo sa saindang pagtutukdo sa mga estudyante an mga topic na may kinaaraman sa katalingkasan, kabayanihan, pagkakasararo asin pagtatarabangan kan mga Pilipino orog na sa mga panahon ngunyan.
Komo pagtataong-linaw, kun gustong mag-suspinder kan klase kan mga nasa private schools, mayo soboot magigin problema huli ta nasa prerogative ini kan pribadong eskwelahan.
Alagad kun nasa pampublikong eskwelahan, kaipuhang magpaaram sa otoridad kun mawot na magsuspinder nin klase. Dugang pa ni Pelingon, mayo man soboot sisay man na nagpapasiring sa saindang opisina o nagpapahayag sa Social Media nin mga pagreklamo manungod sa desisyon na working holiday an February 25. Kundi ini an saindang pigsusunod asin ginagalang.
Sa ibong na lado, tinawang-duon kan opisyal na importante an okasyon na ini nin huli ini an panahon tanganing magirumdoman an pakikipaglaban kan mga Pilipino laban sa bakong matanos na paggogobernar.
Kung kaya sa saindang lado, padagos nindang itinutukdo sa mga estudyante an mga importanteng leksiyon na dapat na manundan tanganing dae malingawan kan mga tawo dawa na yaon na kita sa modernong panahon.
