Nagkawsa an nag-papadagos na tensyon sa Middle east nin mga pagkanselar nin nagkapirang International flights.
Segun sa Civil Aviation Authority of the Philippines (CAAP), 23 na international flights an kanselado mantang tulo an pig-divert huli sa safety concerns asin airspace restrictions poon kan maglansar nin pag-atake an US asin Israel sa Iran kan Sabado, Pebrero 28.
Kabali sa mga nagkanselar nin mga biyahe iyo an Cebu Pacific (2), Philippine Airlines (8), Qatar Airways (2), Gulf Air (1), Etihad Airways (4), asin Emirates (6). Duwang byahe kan Philippine Airlines asin sarong byahe kan Qatar Airways an pig-divert.
Segun ki CAAP Director General Retired Lt. Gen. Raul Del Rosario, naggigibo nin pro-aktibong lakdang an ahensya susog sa direktiba ni Presidente Ferdinand Marcos Jr. Inaabisuhan man an mga apektadong pasahero na makipag-ulay sa saindang airline para sa rebooking, refund, asin updated na impormasyon sa pagbiyahe.
