Mapipiritan na papulion an mga OFWs enkaso magkaigwa nin matinding security risk huli sa nagpapadagos na girian kan mga nasyon kan Estados Unidos, Israel asin Iran.
Sa entrevista kan Bombo Radyo Naga ki Mayor Jerold B. Pena an Alkalde kan banwaan nin San Jose Partido Camarines Sur, minsan man ining naging OFW sa middle east kan nainot na panahon kaya naiisihan kan opisyal an posibleng maging epekto kan girian kan Estados Unidos, Israel asin Iran.
Dagdag pa kan opisyal na igwa nin indirect impact sa nasyon an giyera sa middle east huli ta bareta pa sana asin mayu pa nin physical work, apektado na kaini an satuyang nasyon huli ta kadalasan, an primary input for production and operation kan ekonomiya kan pilipinas, nakadepende sa fuel o anu pa man na by product kan produktong petrolyo.
Igwa man ining direct impact na kun sain enkaso magkaigwa nin security risk sa mga OFW, mapipiritan an gobyerno na papulion an mga OFWs na nakabase sa middle east.
Kadakol na mga pinoy an posibleng mawaran nin trabaho, mawawaran nin remittances na saro sa factor na nakakatabang na mapamarhay an ekonomiya kan Pilipinas huli ta kadaklan sa mga Pinoy, nagtatrabaho sa middle east.
Magigirumduman na kasuudma Marso 2, 2026, nagpaluwas nin memorandum order an alakalde sa banwaan nin San Jose Partido Camarines Sur na maging preparado partikularmente pag abot sa food security huli sa posibilidad na magkaigwa nin kakulangan sa pagkakan.
Mientrastanto, an banwaan nin San Jose igwa nin tanuman nin mais, paroy, livestock, mga gulay asin fishery alagad, pagirumdom kan alkalde na tuyong igwa nin siring kaining sitwasyon importanteng inuton an pagkakan, tubig, ospital asin mga bulong.
Pangapodan na sana kan opisyal na mangadyi an gabos para sa katuninungan kan bilog na kinaban.
