Nananatiling hindi interesado si Pangulong Ferdinand Marcos Jr. na ibalik ang Pilipinas sa International Criminal Court, sa kabila ng patuloy na talakayan at pagsusuri sa isyu, ayon sa Malacañang.
Sinabi ni Atty. Claire Castro, Undersecretary at Press Officer ng Malacañang, sa isang briefing sa New York nitong Lunes, Marso 9, na “Hindi nagbabago ‘yung stance ng Pangulo – hindi pa rin po tayo ngayon magre-rejoin sa ICC.”
Noong 2022, dalawang buwan pa lamang sa kanyang termino, sinabi ni Marcos na walang intensiyon ang Pilipinas na bumalik sa ICC. Ngunit halos isang taon matapos nito, binanggit niya sa media na ang posibilidad ay “under study” at patuloy nilang tinitingnan ang iba pang opsyon.
Inalis ng Pilipinas ang pagiging kasapi sa ICC noong 2019, kasabay ng paghahanda ng tribunal na imbestigahan ang alegasyon ng extrajudicial killings sa ilalim ng administrasyon ni dating Pangulong Rodrigo Duterte sa war on drugs.
Ayon sa Malacañang, bagama’t hindi pa naiaangat ni Marcos ang usapin sa opisyal, nakikinig siya sa damdamin ng publiko tungkol sa posibleng pagbabalik sa tribunal.
