Ipigbuyagyag kan Commission on Elections (Comelec) kan Miyerkules na nagkaka-komplikasyon an proseso sa kaso ni Senator Rodante Marcoleta manungod sa saiyang May 2025 Statement of Contributions and Expenditures (SOCE) makalihis irefer kan Ombudsman an kapareho na reklamo.
Sigon kay Comelec Chairperson George Erwin Garcia, huli nang naghanda an Political Finance and Affairs Department (PFAD) nin rekomendasyon para sa kaso ni Marcoleta, alagad nagkomplikado ini makalihis irefer kan Ombudsman an formal complaint na naghahapot sa parehong SOCE asin Statement of Assets, Liabilities, and Net Worth (SALN) ni Marcoleta.
Base sa saiyang SOCE, nagastos ni Marcoleta an P139.9 milyon sa kampanya para sa senatorial elections kan 2025 na kun sain harayo sa saiyang deklaradong SALN na P51,965,559 asin dai siya nagdeklara nin donasyon.
Dugang pa ni Garcia na tinatalakay na kan Comelec Law Department kun paano hahampangon an overlap kan kaso, mantang tigsierto na igagalang an due process kan senador.
Nagpapadagos man an Comelec en banc sa diskusyon sa kaso, asin sinasabing importante an tulos na aksyon ta nakatutuok an interes kan publiko sa isyu.
