Kaibanan an SWMO sa pagbisita ni DPWH Sec Vince Dizon sa syudad nin naga kan nakalihis na aldaw.
Sa intrevista kan Bombo Radyo Naga ki ENGR. JOEL MARTIN Head, Solid Waste Management Office-Naga, magayon an saindang naging ebalwasyon sa naging aksyon kan national government sa paagi kan pagbisita ni Sec Vince Dizon sa syudad.
Sigon ki Martin, an pinakaproblema kan syudad an pagbaha na kun sain garo nin basin na kun sain tuyong nag uuran nin makusog binabaha an syudad. Dakulang tabang an pagpalinig sa waterways sa syudad alagad saro sa hinihiling na rason kan pagbaha iyo an mga basura dawa sain partikularmente an mga plastic.
Dagdag pa kan opisyal na naapektaran an economic stability kan syudad kun pirmi ining binabaha. Importante na asikasuhon kan syudad an mga waterways kabali an mga illegal settlers na mailipat sa tamang lugar.
An saro pa sa problema an mga residual plastic na nagkalat sa syudad na kun sain mayo nin halaga alagad sigon pa sa opisyal na plano kan alkalde na tawan nin halaga an mga residual na basura sa tabang kan mga indigent sa barangay. Karibay kan sarong kilong basura, karibay kan sarong kilong bagas asin sa paagi kaini, mababawasana an problema sa basura.
Para man sa mga estudyante karibay kan mga scholl suplies an sarong kilong basura. Sigon pa ki Martin na nasa 170 tons na basura an nahahakot arualdaw na kun sain 94 tons sana dati tolong taon na an nakakalihis asin base sa projection kan opisyal, sa masunod na taon posibleng mag abot na sa 200 tons an makolektar na basura na kun sain pweding ng ikumparar an Naga sa darakulang syudad sa bilog na nasyon.
