Muling nagbuga ng abo ang Mt. Kanlaon ngayong Sabado, Marso 21, 2026, ayon sa Philippine Institute of Volcanology and Seismology (Phivolcs).
Nagsimula ang ash emission bandang 5:58 AM, na lumikha ng kulay-abong ulap na umabot sa 500 metro mula sa bunganga at lumihis patungong timog-kanluran. Nanatili sa Alert Level 2 ang bulkan, na nangangahulugang may moderate na antas ng aktibidad at posibleng magkaroon ng biglaang pagsabog. Dahil dito, mahigpit na ipinagbabawal ang pagpasok sa loob ng 4-kilometrong Permanent Danger Zone of Mt. Kanlaon.
Naitala rin kahapon, Marso 20, ang dalawang ash emission events na tumagal ng halos dalawang oras, limang volcanic earthquakes, at sulfur dioxide emissions na nasa pagitan ng 434 hanggang 2,021 tonelada bawat araw.
Patuloy ang pakikipag-ugnayan ng Phivolcs sa mga lokal na pamahalaan upang matiyak ang kaligtasan ng mga residente, lalo na sa timog-kanlurang bahagi ng Negros na maaaring maapektuhan ng ashfall.
Binabantayan din ng Phivolcs ang mga aktibong bulkan tulad ng Mayon Volcano, Mt. Bulusan, at Taal Volcano dahil madalas itong magpakita ng abnormalidad.
