Mantenidong normal an operasyon kan Bicol Central Station mantang nagpapadagos an pagmonitor sa bilang kan mga pasahero, partikular na an mga nag-arabot.
Sa intrevista kan Bombo Radyo Naga ki Bicol Central Station Terminal Manager Nonoy Reforsado, piglalaoman na mapuon an peak operations sa maabot na semana nin Semana Santa, partikularmente sa Abril 5, kun sain piglalaoman na magbuburunyog an mga mauruli sa Bicol tanganing magbakasyon asin mag-obserbar kan Semana Santa.
Sa mga terminal sa Metro Manila halos fully na an biyahe ngunyan na semana. Mientrastanto, sa Bicol Central Station, haros pano man an mga regular na byahe poon Abril 5 asin sa bilog na masunod na semana.
Huli sa halangkaw na presyo kan krudo, an nagkapirang kompanya nin bus nag-implementar nin pagbawas sa saindang mga yunit. Imbes na bawasan an biyahe, pinagsasaro ninda an mga iskedyul tanganing maseguro na pano an kada biyahe.
Base sa datos, mantang dati an sarong bilog na tangke nin sarong bus nagkakantidad sana nin ₱22,000, iyan ngunyan minaabot na sa ₱44,000. Nin huli kaini, kinakaipuhan na maseguro na labi sa kabanga an pano kan bus tanganing dae malugi an mga operator. An ibang mga ruta nag-implementar man nin sarong “color coding” na iskema kun saen an mga yunit nagsasalin-salin kan saindang mga pagbiyahe depende sa aldaw (halimbawa: MWF-Domingo asin TTH-Sabado), mantang an ibang mga yunit temporaryong naka-garahe.
Sa ibong kan krisis sa gasolina, dae man naglangkaw an pamasahe kan mga bus operators makalihis na i-revoke kan LTFRB an dati nang inaprobaran na fare increase sa direktiba kan gobyerno. Kaya, aplikado pa man giraray an nakaaging pamasahe. Sagcod ngonian, mayo pang nareresibeng reklamo hale sa mga pasahero manungod sa nasabing byahe. Sinusunod man giraray an polisiya na tulos na maghali an bus kun ini pano na, dawa pa dae pa nag-abot an nakatalaan na oras kan paghale.
Pigpaliwanag ni Reforsado na mas naeeksperyensiyahan an pagruso kan mga pasahero sa semana nin semana santa kumpara sa mismong semana santa. Ini huli ta kadaklan sa mga biyahero gikan sa Metro Manila pauli sa saindang kanya-kanyang probinsya. Mientrastanto, an mga lokal na residente sa Bikol dae gayong nagbibiyahe paluwas sa rehiyon sa panahon na ini.
Bilang preparasyon, nagkaigwa na nin meeting an management sa mga personahes, vendors, asin dispatchers. Napakusog man an koordinasyon sa mga ahensya arog kan Philippine National Police (PNP), Land Transportation Office (LTO), asin LTFRB.
Igwa man nin ibinugtak na police assistance desk sa terminal ngani na masierto an seguridad kan mga pasahero, mientras na padagos an inspeksyon sa mga bus nganing maseguro an saindang roadworthiness asin maibitaran an paglaog kan mga “colorum” na behikulo. Kun kinakaipuhan, pwedesir na i-implementar an “no day-off policy” para sa mga personahes puon Abril 5 para ma-akomodar an piglalaoman na pagdagsa kan mga pasahero.
