Nagpahayag an mga paraoma sa Barangay San Jose kan saindang mga paghadit asin nangapudan nin tabang manungod sa epekto kan “Iconic Building” asin iba pang development projects na pigtutugdok sa saindang kabuhayan.
Sa entrevista kan Bombo Radyo Naga ki Lorradel Alamo (Barangay Captain, San Jose, Pili, Camarines Sur), sinabi kaini na direktang apektado kan proyekto an nagkapira sa mga paraoma sa saindang lugar, partikularmente itong mga nawaran nin oma huli sa land development sa inaapod na “Uptown” area.
Dawa ngani aram kan mga residente an katuyuhan kan pag-uswag, nag-iinsistir an mga paraoma na nawawara an saindang mayor na pinagkukuanan nin kita. Huli kaini, an saindang mayor na agrangay iyo an supisyenteng asistensya asin bayad hale sa gobyerno tanganing makabawi sa epekto kan proyekto.
Sinabi pa ni Alamo na pigkakarkulong dakul na sa mga paraoma sa barangay an apektado, dawa ngani dae pa aram an eksaktong numero. Sa ibong kaini, padagos sindang nag-aadaptar sa mga pagbabago na dara kan urban development sa lugar. Mientrastanto, pigsierto kan barangay na nakalinya sinda sa mga programa kan lokal na gobyerno asin kan Department of Agriculture ngani na matawan nin suporta an mga apektadong paraoma, kabali na an subsidiya asin iba pang ayuda.
Sa tahaw kan modernisasyon, an pagsierto na an sektor nin agrikultura dai mawawalat nagdadanay na sarong angat, orog na an mga saradit na paraoma na direktang apektado kan darakulang proyekto arog kan “Iconic Building.”
