Padagos na namamatean kan mga tawo an epekto kan paglangkaw kan presyo kan langis sa nasyon, na nagkawsa nin sunod-sunod na paghiro sa presyo kan pamasahe asin mga basic commodities.
Sa entrevista kan Bombo Radyo Naga ki Alfonso Rodriguez, Barangay Kapitan, San Felipe, syudad nin Naga, saiyang sinabi na importante an tulos na pagresponde kan gobyerno sa arog kaining klase nin krisis. Tinawan nin duon na dapat andam an gobyerno na magtao nin ayuda sa mga tawo, lalo na sa mga sektor na grabe an apektado.
Sa bagay na ini, an importansya kan mga programa nin ayuda asin subsidiya sa gasolina pigmidbid bilang pansamantalang solusyon tanganing maibsan an pagabat kan publiko. Alagad, pigduon na an mga ini bakong supisyente bilang panghaloyan na simbag sa padagos na paglangkaw kan presyo kan langis.
Mientras tanto, pigkokonsiderar na halos dae malilikayan na maglangkaw an pamasahe huli sa paglangkaw kan presyo kan krudo. Huli kaini, piglalaoman na magkakaigwa nin domino effect na iyo man an magtulod sa paglangkaw kan presyo kan ibang serbisyo asin barakalon.
Nin huli sa hiwas kan epekto kaini, nangangapudan an opisyal sa gobyerno na mag-implementar nin mas makusog asin mas halawig na lakdang ngani na mamantenir an estabilidad kan ekonomiya asin maprotehiran an karahayan kan namamanwaan.
