Nilinaw kan Presidente kan Supreme Student Council (SSC) nin BISCAST an isyu manungod sa posible na paglipat kan venue kan 2026 Commencement Exercises sa Kafuerte Sports Complex, na sa ngunyan dai pa man pinal na desisyon o opisyal na anunsyo gikan sa administrasyon.
Sa intrevista kan Bombo Radyo Naga ki Recy Angely Sa. Balauro (President kan BISCAST-Supreme Student Council), ipinahayag niya an saiyang pakikisumaro sa mga namamatean kan mga graduating students na gusto na idaos an graduation sa sulod kan BISCAST Pavilion.
Segun saiya, an nasabing lugar igwa nin maray na sentimental na kahulugan, ta digdi ginibo an kadakol na mahahalagang aktibidad asin mga eksperyensya kan mga estudyante sa laog kan saindang akademikong paglalakbay. Alagad, pigbibisto man kan SSC an mga konsiderasyon kan administrasyon, kasubag an limitadong espasyo, kakulangan sa parking, asin mataas na heat index sa sulod kan pavilion. An Kafuerte Sports Complex an pigkonsidera bilang alternatibo mas maluwag asin mas komportableng pasilidad ini. An sentimyento ini naipabot na sa administrasyon.
Dinagdag pa ni Balauro na padagos an pakikipag-ugnayan kan SSC sa pamunuan kan unibersidad, kasubag an University President asin an Vice President for Academic Affairs. An magiging pinal na desisyon nakabase sa pulso kan mga estudyante. Bilang kasimbagan, naghahanda an SSC nin pormal na resolusyon na magrerekomenda na idaos an 2026 Commencement Exercises sa BISCAST Pavilion, kun kaipuhan. Inaamin man kan SSC na igwa nin mga pagkakataon na nagkulang sa agarang pagbibigay nin update sa mga estudyante, kaya nangako ini na paiigtingon an transparency asin komunikasyon sa mga masunod na aldaw.
Pigtawan-duon man kaini na an graduation sarong importanteng milestone para sa mga estudyante, kaya dapat sana na an desisyon magrepresentar sainda—sa pinagdaanan, sakripisyo, asin tagumpay bilang parte kan komunidad nin BISCAST.
