Makakaresebir nin Fuel Subsidy an 274 na tricycle drivers sa banwaan nin Canaman, Camarines Sur makalihis na maipadara kan Department of Social Welfare and Development (DSWD) an opisyal na listahan nin mga benepisyaryo sa lokal na gobyerno.
Sa intrevista kan Bombo Radyo Naga ki Nelson Legaspi, Mayor LGU-Canaman Camarine Sur, isasagibo an ngunya sa KaFuerte Sports Complex sa Kapitulyo. 305 an orihinal na bilang na isinumiter, nagin 274 na sana an kompirmadong makakatanggap huli sa ma driver dai na aktibo sa pamamasada o nagluya na an interes.
Ipinaliwanag kan alkalde na an pagpili kan mga benepisyaryo nag-agi sa beripikasyon kaiba an mga lider kan Tricycle Operators and Drivers Association (TODA), kan listahan man gikan sa treasurer’s office kan mga rehistradong nagbabayad. Isipigiba sa listahan an mga aktibong namamasadang driver maski may iba na may isyu sa prangkisa, basta may valid na lisensya.
Mientrastanto, padagos man an implementasyon kan programang “libreng sakay” sa pagkabanggo para tabangan an mga pasahero na makauli. Ini nag-ooperate gikan alas 7:30 k hasta alas 10:00, pero puwedeng magpadagos hasta alas 11:00 kung may mga pasaherong nag-aabang pa. Segun sa alkalde, dai direktang apektado an mga tricycle driver kan libreng sakay dahil limitado la an ruta ninda sa sulod kan Canaman asin dai nakakaabot sa karatig syudad kan Naga.
Alagad, pigbisto kan lokal na gobyerno an kadipisilan na dinadanas kan sektor, lalo na ta nagataas an gastos sa pamamasada kumpara sa kinikita.
Dugang pa kaini, padagos an libreng sakay basta dai pa nagbabalik sa normal an sitwasyon kan transportasyon sa lugar. Pigsierto man ni Legaspi na may sapat na pondo an lokal na gobyerno para suportaran an programa.
Piglalaoman na sa paagi kan subsidy, makakaigwa nin pansamantalang ginhawa an mga tricycle driver na padagos na nakakaeksperyensya nin hamon sa kulang na kita asin halangkaw na gastos sa aroaldaw na pamamasada.
