Ipigpresenta kan House Committee on Justice an Statement of Assets, Liabilities, and Net Worth (SALN) ni Bise Presidente Sara Duterte sa ipigkundusir na impeachemnt hearing, na nagbuyagyag na dai ini nagdeklara nin ano man na petty cash o bank deposits poon 2019 hasta 2024, sa ibong kan padagos na paglangkaw kan saiyang net worth.
Segun sa mga dokumento na iprinesentar sa komite, igwa nin liquid assets si Sara Duterte kan mga nakalihis na taon, kabale na an milyones pesos na cash asin deposito poon 2007 hasta 2018, alagad biglang nawara an mga ini sa saiyang mga deklarasyon puon kan 2019.
Durante kan hearing, hinapot ni Manila Rep. Joel Chua si Ombudsman lawyer na si Karen Batu kun posibleng dae nagdeklarar an bise presidente dawa sarong pesos na cash poon 2019 hasta 2024.
Segun sa mga mambabatas, kaiba na si Bicol Saro Rep. Terry Ridon, igwa nin inaapod na “P50 million gap” sa income ni VP Sara poon kan siya maglaog sa gobierno kan 2007.
Sinabi man ni Mamamayang Liberal Party-List Rep. Leila de Lima na an biglang kawaran nin mga likidong pagsadiri sa mga masunod na SALN nakakahadit, asin ini pwedeng makaapektar sa kredibilidad kan mga pinansyal na pagbuyagyag kan bise presidente.
Susog sa rekord, an net worth ni Vice President Sara Duterte naglangkaw poon P7.2 milyon kan 2007 pasiring sa P88.5 milyon kan 2024, na nag-agi nin nagkapirang pag-itaas asin pagbaba kan mga nakaaging taon mantang siya nagkakapot nin manlaen-laen na posisyon sa gobyerno.
Mientrastanto, dai tulos nagpaluwas nin pahayag an kampo ni VP Duterte. Segun sa saiyang tagapagtaram na si Atty. Michael Poa, mayo pa sindang opisyal na pahayag.
