Pinalaya na an driver na imbwelto sa sarong multi-vehicle accident makalihis na mayo nin nagrereklamo na nagsangat nin kaso laban saiya.
Sa intrevista kan Bombo Radyo Naga ki PCPT Rowena Lim, Station Commnader, Naga City Police Office 1, sinaysay kaini na base sa imbestigasyon, nakaluwas na an suspechado poco mas o menos alas 11 nin aga kasuodma makalihis na matapos an 18 oras na reglementary period of detention. Segun sa mga awtoridad, nagkaigwa nin orolay an duwang lado asin nagtao man nin affidavit an mga nagrereklamo na dae na sinda interesado na magsangat nin reklamo.
Sa kabilogan, maabot sa 14 indibidwal an apektado kan insidente kabale na an kagsadiri kan mga behikulo asin sarong tindahan na naraot. Limang katawo an nalugadan asin dinara sa ospital, alagad nagsapo sana nin diit na lugad.
Kabali sa mga imbwelto sa aksidente iyo an duwang motorsiklo, tolong traysikel, duwang private vehicle. Sa inisyal na report, enot na nabunggo kan Montero Sport an sarong motorsiklo antes nawaran nin kontrol an driver.
Imbes na magpreno, nag-fail suboot an preno asin handbrake kan behikulo kaya padagos ining nag-akselerar asin nagbangga sa nagkapirang behikulo asin istruktura, kabale na an sarong monumento sa lugar.
An mga imbestigador pig-aaram kun an kombinasyon kan human error asin mechanical failure an posibleng nagin kawsa kan aksidente.
Segun sa pulis, babayadan kan driver an gabos na medical expenses kan mga nalugadan siring man an compensation sa mga naraot na propyedad. Sarong kasunduan sa pakikipagkompromiso an piggigibo ngonyan sa pag-ultanan kan duwang partido tanganing sa katapustapusi matapos an bagay.
Padagos na pigbabantayan kan mga otoridad an kondisyon kan mga nairido, mantang pighahalat an kumpirmasyon kun nakaluwas na an gabos sa ospital.
Pinapagiromdom kan pulisya an mga motorista na importanteng siguraduhon na nasa marhay na kondisyon an saindang lunadan bago magbiyahe. Maninigo man nindang siertohon na an drayber nasa tamang kamugtakan—bakong torog o may helang—tanganing malikayan an mga aksidente.
Katakod kaini, pinapagirumdom man an mga pedestrians asin iba pang paragamit kan tinampo na mag-ingat, lalo na sa mga matawo asin madaling maaksidenteng lugar arog kan mga merkado asin convergence zones.
Mientrastanto, narisa man kan pulisya na naitala man an kaparehong insidente sa parehong lugar kan mga nakalihis na bulan kun saen binawian nin buhay an sarong motorista makalihis na mabangga nin awto.
Padagos an pangapudan kan mga otoridad para sa mas dakulang pag-iingat sa tinampo para maibitaran an arog kaining klase nin insidente.
