Nagsunad si Senador Imee Marcos kan Senate Bill No. 2067 o sarong bill na naghahagad na ipagpauktaba an Barangay and Sanguniang Kabataan Elections (BSKE) poon Nobyembre 2026 sagkod Oktubre 2027 huli sa kahandalan na posibleng dakul na mga Pilipino an dai makaboto huli sa halangkaw na pamasahe huli sa halangkaw na presyo kan krudo.
Inasegurar kan bill na kun ma-postpone an eleksyon, madagos an serbisyo kan mga opisyales kan barangay, dakulang tabang ngani na makatutok sinda sa pagresponde sa mga pangangaipo kan saindang mga komunidad sa tahaw kan krisis.
Apwera kaini, pigtutukdo man na maabot sa P16 bilyones an magagastos para sa BSKE segun sa Commission on Election (COMELEC), dae pa kabali an dagdag na gastos para sa Philippine National Police (PNP), Department of Education (DepEd) asin lokal na gobyerno.
Pigduon ni Marcos na mas marhay na gamiton muna an nasabing multi-billion na budget nganing matawan nin mga basic needs kan mga Pilipino arog kan pagkakan, krudo asin iba pang serbisyo.
Segun ki Marcos, tamang-tama man an Eleksyon pagkatapos nin Undas, kaya suboot piglalaoman niya an dakul na numero nin mga biyahero asin halangkaw na pamasahe.
Tinawang-duon kan senador na importante an Undas sa mga Pilipino bilang panahon nin pagrumdom sa saindang mga nagadan nang pamilya, kun kaya dapat suboot na tugotan an mga Pilipino na magpangadyi asin magrumdom sa saindang mga mahal sa buhay sa bulan nin Nobyembre na warang distractions kan pirilian asin pulitika.
