Nag-implementar na nin checkpoint an gobyerno kan Barangay Fabrica, Bula, Camarines Sur kontra sa African Swine Fever (ASF) kasunod kan pagkumpirma kan sarong kaso sa kataid na barangay.
Obheto kan lakdang na maibitaran an posibleng paglaog asin paglakop kan helang na posibleng makaapektar sa mga domestic pigs sa lugar.
Sa intrevista kan Bombo Radyo Naga ki Kagawad Imelda Dacara Odavar kan Barangay Fabrica, Bula, Camarines Sur, sinabi kaini ginibo na an implementasyon makalihis an pagtiripon na pinangenotan kan Municipal Agriculture Office (MAO) kan Pili kun saen nakumpirmar an kaso kan ASF sa nasambitan ng banwaan.
Sa lindong kan bagong polisiya, mahigot na pigbabantayan an paglaog asin pagluwas kan mga behikulo asin produktong may kinaaraman sa pork. An checkpoint ipinaotob bilang parte kan mga lakdang sa biosecurity tanganing maprotehiran an kabuhayan kan mga residente na nagsasarig sa pag-ataman nin hayop.
Kabale sa mga pigbabantayan iyo an pagdara nin karneng orig, karne, asin iba pang posibleng carrier kan virus ngani na masierto na dae ini makalaog sa barangay.
Sa ngunyan, nasa pink zone na an estado kan banwaan nin Bula, indikasyon kan heightened alert kontra ASF.
Huli kaini, mantenidong naka-alerto an lokal na gobyerno asin padagos na pigbabantayan an mga barangay boundaries bilang pag-iingat sa posibleng paggrabe kan sitwasyon.
