Bilang parte kan National Farmers and Fisherfolk Month ngunyan na Mayo, pig-iimplementar kan BFAR an “Mangingisdang Director Program” nganing midbidon an kontribusyon kan mga parasira asin pakusugon an relasyon kan ahensya sa sektor susog sa Special Order No. 88, Series of 2005.
Sa intrevista kan Bombo Radyo Naga ki Rowena B. Briones Regional Information Officer – BFAR BICOL, sinaysay kaini na sa lindong kan programa, igwa nin “role-switching” kun sain sarong leader-fisher an ma-take over komo Regional Director, mantang an presenteng director maagi sa immersion sa fishing community.
Si Mr. Casendo Entico na taga Gubat, Sorsogon an nanombrahan bilang ika-21 na Fishing Director sa Bicol. Nakatalaan an saiyang pag-instalar sa Mayo 5 sa Tabaco City. Para sa taon 2026, si Mr. Casendo Entico gikan sa banwaan nin Gubat, Sorsogon an magiging ika-21 na Fishing Director kan rehiyong Bikol.
Siya an piglalaoman na mangengenot sa opisina kan BFAR sa laog nin sarong bulan tanganing maeksperyensiyahan an bureaucracy process, paggibo nin polisiya, asin administrasyon kan mga programa kan ahensya.
Mientrastanto, an presenteng Regional Director mababa sa komunidad tanganing direktang maeksperyensiyahan an pang-aroaldaw na angat kan mga parasira sa kadagatan, sa katuyuhan na mapararom an pagkasabot kan liderato sa tunay na kamugtakan kan sektor.
An opisyal na seremonya nin pag-instalar kan Entico nakatalagang gibohon sa Mayo 5, 2026 sa Siyudad nin Tabaco. Bilang parte kan saiyang termino, piglalaoman man na makakabilog siya nin “five-point agenda” na maserbing giya sa saiyang mga propuestong reporma asin programa.
Sabayan ini kan “Fisherfolk Wellness Month” na matao nin libreng serbisyo medical asin dental. Sa katapusan kan programa, si Entico masumiter nin report asin rekomendasyon na gagamiton kan BFAR sa pagpakarhay kan saindang mga polisiya.
