Itinanggi ni media founder Franco Mabanta ang umano’y pagkakasangkot sa tangkang robbery by extortion laban kay dating House Speaker Martin Romualdez, matapos siyang arestuhin sa isang entrapment operation ng National Bureau of Investigation.
Ayon sa National Bureau of Investigation, naaresto si Franco Mabanta kasama ang apat na iba pa kaugnay ng hinihinalang extortion scheme laban kay Martin Romualdez.
Sinabi ni NBI Director Melvin Matibag na isinagawa ang entrapment operation matapos umanong humingi ng hanggang P300 milyon ang mga suspek kapalit ng hindi paglalabas ng mga video na makakasira sa nagrereklamo.
Ayon pa sa NBI, nagsimula umano ang negosasyon isang taon na ang nakalipas at muling umusbong kamakailan, kung saan umabot pa umano sa P350 milyon ang hinihinging halaga bago ito ibinaba sa P300 milyon.
Sa kabilang panig, iginiit ng kampo ni Franco Mabanta na inosente siya at ang kanyang grupo, at may bahid umano ng pulitika ang mga paratang. Ayon sa kanilang pahayag, isang “setup” ang ginawang pag-aresto sa media founder.
Dagdag pa ng grupo, matagal na umano nilang inihahanda ang isang komprehensibong exposé laban kay Martin Romualdez, kabilang ang isang 90-minutong video na sinasabing naglalaman ng ebidensya ng katiwalian.
Inaasahang haharap ang mga naaresto sa kasong robbery by extortion at posibleng paglabag sa Cybercrime Prevention Act.
Samantala, patuloy pang hinihingi ang panig ni dating House Speaker Martin Romualdez kaugnay ng insidente.
