Piglalaoman na gigibuhon kan Kamara de Representantes an pinal na pagboto sa report kan Committee on Justice katakod kan impeachment case laban ki Vice President Sara Duterte.
Sa intrevista kan Bombo Radyo Naga ki Atty. Jerico Angelo P. Galvez (Election Lawyer), sinabi kaini na maabot sa 55 na pirma an nakolekta sa komite, mantang 106 na boto an kaipuhan tanganing maipaabot ini sa Senado para sa pormal na pagbista. May mga mambabatas man na sinasabing nagsusuporta sa lakdang na posibleng maglampas sa 200 kun iiba an bilog na plenaryo.
Kabale sa mga mayor na alegasyon sa reklamo iyo an suboot salang paggamit kan confidential funds, mismatched assets sa record kan SALN asin BIR, errors sa property declaration, asin mga alegasyon na may relasyon sa mga huma laban sa nagkapirang opisyales kan gobyerno. Alagad, an mga ini nagdadanay na mga alegasyon sana asin piglalaoman na mag-aagi nin lubos na pagdangog.
Kun ipapasa sa Senado, an presenteng Presidente kan Senado an maserbing presiding officer sa impeachment trial. An ibang mga eksperto sa ley nagtutukdo sa posibleng pangangaipo para sa mga manedyer nin impeachment na magtabang nin tamang pag-olayan an mga ebidensya asin mga susundon sa prosedimiento.
Pigtawan-duon na an resulta kan proseso igwa nin mahiwas na implikasyon sa pulitika, kaiba na an posibleng epekto sa masunod na eleksyon. Kun mapatunayan na nagkasala, pwede siyang haleon sa opisina asin atubangon an diskwalipikasyon sa pagkapot kan pampublikong opisina, mantang an abswelto magtatao nin mas makusog na posisyon sa pulitika.
Hinahalat pa an resulta kan botohan sa Kamara asin an mga masunod na lakdang kan Senado sa isyu.
Mientrastanto, segun sa intrevista kan Bombo Radyo Naga ki Danilo Arao, Propesor Kontra Daya Convenor, piglalaoman na magiging komplikado an pagbista huli ta kinakaipuhan an dos-tersio kan boto para sa conviction, mantang siyam na boto sana an igo tanganing ma-abswelto an akusado. An nagkapirang senador piglalaoman man na magkaigwa nin makusog na paninindugan, alagad an mga resulta kan pagboto nagdadanay na “fluid.”
An nagkapirang grupo kan sosyedad sibil na pinangenotan ni Kontra Daya naghahagad nin transparensya, paninimbagan, asin independienteng paggibo nin desisyon kan mga lehislador, asin nag-eengganyar sa publiko na bantayan an proseso nin pag-impeach tanganing masierto an sarong patas asin matanos na paglilitis.
Piglalaoman sa mga masunod na aldaw an pormal na transmittal kan Articles of Impeachment gikan sa Kamara de Representantes pasiring sa Senado para sa pormal na hearing.
