Ipinaliwanag ni Deputy Speaker Ronaldo Puno kun tano nagboto pabor an mga miyembro kan National Unity Party (NUP) sa House General Appropriations Bill, sa ibong kan mga nahihiling nindang kaipuhan baguhon sa panukalang pambansang budget.
Sa nagin pagtiripon kan NUP asin People’s Budget Coalition, hinapot ni PBC Co-convenor Kenneth Isaiah Ibasco Abante kun tano sinuportahan pa man giraray kan partido an House version kan budget dawa igwa na sindang mga iprinoponer na reporma asin dai man sinda nag-uuyon sa nagkapirang parte kaini.
Bilang simbag, sinabi ni Puno na enot nindang pinag-isipan na mag-abstain sa botohan alagad kan huri nagdesisyon sindang magboto nin ‘yes’ huli sa mga konsiderasyong pampulitika sa laog kan Kamara.
Ipinaliwanag niya na igwang 58 miyembro an NUP sa House of Representatives asin inaasahan an pagkasararo kan mga ini sa pagboto bilang sarong partido.
Isinasaalang-alang man ninda na dai supisyente an saindang bilang tanganing mabago an resulta kan botohan.
Dugang pa digdi, nangamba sindang masisi sa posibleng pagkaantala kan pagpasa kan pambansang budget kun nagboto sinda kontra sa panukala.
Sinambit man ni Puno na pwedeng pag-ulayan pa an mga iprinoponer na pagbabago sa sunod na yugto kan proseso, partikular sa bicameral conference committee o bicam, kun sain pag-uulayan kan mga representante kan Senado asin Kongreso an saindang magkabaranga na bersyon kan budget.
Pinakinggan man kan PBC an mga paliwanag kan NUP tanganing mas masabutan an nagin posisyon kan partido asin matukoy an mga posibleng lugar nin pagtarabangan.
Minsan siring, idinugang kan grupo na nagdadanay na igwang paninimbagan an mga mambabatas na nagboto pabor sa HGAB, ano man an saindang nagin rason sa pagsuporta digdi.
Segun sa PBC, importante na magkaigwa nin malinaw na mga lakdang tanganing matugunan an mga isyung nahiling sa presenteng bersyon kan panukalang budget.
Sa ibong kan mga pagkakaiba sa nagkapirang usapin, nagpahayag man nin pagigin andam na magtarabangan an NUP asin PBC tanganing maisulong an mga reporma sa proseso kan paggibo asin pagsusuri kan pambansang budget.
Naroromdoman na kaiba sa mga isyung ipinublikar kan PBC sa House version kan panukalang 2027 national budget an haros 7,000 infrastructure projects na nagkakahalaga nin P190 bilyon na segun sa grupo, mayo nin supisyenteng publicly available supporting documents.
Padagos na isinusulong kan mga budget watchdog an mas mahiwas na transparency sa pagtao nin pondo, kaiba an pagkaigwa nin malinaw na dokumentasyon asin basehan para sa mga proyektong kaiba sa pambansang budget.
