Pigkokonsiderar kan Senado an Magna Carta for Journalists and Media Workers Bill, na may katuyuhan na mapakusog an derechos, seguridad, asin benepisyo kan mga peryodista asin media workers sa nasyon.
Sa entrevista kan Bombo Radyo ki Professor Danilo Arao Convenor, Kontra Daya, sinabi kaini = na importante an bill tanganing maseguro an patas na sweldo, tamang kondisyon sa pagtrabaho, asin mas ligtas na kapalibutan para sa mga nagtatrabaho sa media, orog na sa tahaw kan mga insidente nin violence asin harassment sa nagkapirang peryodista.
Tinawan duon ni Prof. Danilo Arao na dapat itutok an atensyon sa pag-implementar kan eksistidong labor laws imbes na tulos magdagdag nin mga bagong regulasyon, apuwera sana kun may malinaw na kakulangan sa presenteng sistema.
Pigtutukdo man kaini an pagkakaiba kan dominanteng media asin alternatibong media, kun saen an nagkapirang organisasyon boluntaryo o dai regular na binabayadan, kun kaya importante na dai gibohon na masyadong estrikto o bakong maninigo an ley para sa manlaen-laen na klase nin media setup.
Mientrastanto, igwa man nin mga kahaditan na an ley pwedeng magamit sa salang paagi, partikularmente kun ini magdara sa sarong estriktong sistema nin akreditasyon na pwedeng makaapektar sa katalingkasan kan prensa asin makapugol sa peryodismo kan mga namamanwaan.
Sa ngunyan, nagpapadagos an mga deliberasyon sa bill mantang naghahalat nin mas mahiwas na konsultasyon gikan sa mga stakeholders sa industriya kan media asin mga grupo kan sosyedad sibil.
