Positibong indikasyon para sa ekonomiya kan nasyon an pagranggo kan Pilipinas komo ikatolong pinakamaogmang nasyon sa lugar nin trabaho,basado sa sarong international survey.
Sa intrevista kan Bombo Radyo Naga kay Dr. Emmanuel A. Onsay, CPA (Economist and Assistant Professor, Partido State University), sinabi kaini na 77 porsyento kan mga Filipino workers na nagpartisipar sa survey an nagsabi na maogma sinda sa saindang mga trabaho. Kadaklan sa mga nagsimbag hale sa sektor nin korporasyon, BPO, asin mga propesyonal na trabahador sa online.
Segun sa ekonomista, an halangkaw na kaogmahan kan mga empleyado nakakatabang na mapalangkaw an produktibidad asin motibasyon kan mga obrero na igwa nin positibong epekto sa ekonomiya. Sa ibong kaini, piglinaw kaini na may limitasyon an survey huli ta self-reported an data asin mayo man nin total sample size an pigluwas.
Sinabi man ni Onsay na an hababang sweldo, halangkaw na inflation, asin an paglangkaw kan AI sa nagkapirang trabaho pwedeng makaapektar sa satisfaction sa trabaho kan mga empleyado sa maabot na panahon.
Tinawan nin duon na importante na mapakarhay an kamugtakan sa trabaho, mga sweldo, asin mga benepisyo kan mga obrero. Inenkaminar man kaini an mga empleyado na balansehon an trabaho asin personal na buhay tanganing mamantenir an satisfaction asin motibasyon sa trabaho.
