Magdadanay na vigilant an Bangko Sentral ng Pilipinas (BSP) asin magbabase sa mga nagluluwas na datos mantang padagos nindang pig-aadalan an epekto kan mga pangyayari sa Middle East asin kan nag-eeksistir na El Niño sa inflation asin ekonomiya.
Nabatid na naglangkaw sa 7.8% an year-on-year headline inflation kan Oktubre hale sa 7.2% kan Setyembre, na nakalaog man sa 7.1 sagkod 8.1% pagtaya kan ahensya.
An bagong paglangkaw na ini uyon sa inaasahan kan central bank na magdadanay na halangkaw an lebel kan inflation sa masunod na mga bulan sa nasyon.
Panginot na nagtulod sa paglangkaw kan mga presyo an pagtaas kan lokal na presyo kan lana asin pamasahe sa transportasyon sa bilog na kapuluan.
Huli kaini, nakaabot sa 5.6% an average headline inflation sa enot na sampulong bulan kan 2026, na nalampasan an full-year target na 3.0% asin an tolerance range na poco mas-o menos 1 percentage point.
Nakaabot man sa 5.4% an core inflation kan Oktubre hale sa 4.8% kan Setyembre matapos halion an pabago-bagong presyo kan pagkakan asin enerhiya.
Mantang, naglangkaw man sa 9.5% an inflation para sa pinakamahirap na 30% kan mga pamilya sa nasyon kumpara sa naitalang 9.0% kan nakaaging bulan.
