Nagpatanid an Metro Naga Water District (MNWD) kontra sa iligal na paggamit kan mga booster pumps na direktang konektado sa saindang distribution line.
Sa entrevista kan Bombo Radyo Naga ki Choppy Dy-Liacco Dela Cruz (Public Information Officer, Metropolitan Naga Water District), sinaysay kaini na kontra sa National Water Act asin Presidential Decree No.
Pig-eksplikar ni Dela Cruz na an pagbomba nin direkta hale sa main line nagsusupsop kan pressure na dapat pantay-pantay na idistribwir sa mga konsumidores. Apwera kaiyan, pwede man ining magcausa nin kontaminasyon sa sistema nin tubig kun an presyon sa laog kan mga tubo minababa. Tinawan doon kan MNWD na legal sana an paggamit nin booster pumps kun an tubig maagi muna sa cistern tank antes ibomba sa laog kan harong.
Sa ngunyan, nagkokondusir nin inspeksyon an MNWD task force sa manlaen-laen na residensyal asin komersyal na establisimiento sa mga lugar arog kan CBD 1, Igualdad, Abella, Santa Cruz, asin Bayawas. An mga mabalgar papadarahan nin Notice of Violation asin tatawan nin 15 sagkod 30 aldaw tanganing itama an saindang mga koneksyon bago pa man mapasairarom sa magkakanigong penalidad.
Sigon ki Dela Cruz, mamumultahan nin ₱5,500 an mga residensyal na konsumidor na mapatunayan na nagbalga, kabali an reconnection fee, mantang an mga establisyementong komersyal an multahan nin ₱10,000. An saindang serbisyo pwede man na madiskonekta kun sinda dai magsunod sa laog kan itinalaan na panahon nin pagsunod.
Mientrastanto, padagos man an rehabilitasyon kan waterlines asin pagkonstruhir nin pitong pumping station ngani na mapakarhay an supply nin tubig sa syudad. Kabali man sa mga proyekto an transmission line hale sa Almeda Highway pasiring sa Mabolo Reservoir asin an paghirahay kan Panicuason Pumping Station, na target na matapos antes an pagbukas kan klase sa Hunyo 8.
