Piglinaw kan legal expert an pagkakaiba kan Oral Defamation, Libel, asin Cyberlibel na padagos na legal na isyu sa Pilipinas, orog na sa pagdakol kan social media.
Sa intrevista kan Bombo Radyo Naga ki Atty. Christine Faith Sabella (Abogado), sinabi niya na an Oral Defamation o slander nanonongod sa defamation na ginigibo sa paagi nin oral statements. An libel yaon sa nakasurat na porma, mantang an Cyber fiLibel ginigibo sa paagi nin mga online na plataporma arog kan social media.
Segun ki Sabella, igwa nin apat na mayor na elemento na dapat patunayan tanganing makonsiderar na libel an sarong pahayag: imputation, defamatory character, malisya, asin publikasyon. Dawa dai direktang nginaranan an sarong tawo, puwede pa man giraray na ikonsiderar na libel kun madali siyang mabisto base sa laog.
Lininaw man niya na an katotoohan o opinyon kan sarong pahayag bakong automatikong proteksyon laban sa sarong kaso nin libelo. Kung mapatunayan na may intensyon na magpararaot, an tawong nagsabi o nagpost pwede pa man giraray na maninimbag.
Sa kaso kan social media, bako sana an orihinal na poster kundi pati an mga nagshare o nagkokomento sa nakakapanraot na pahayag pwede man na maninimbag. Mientrastanto, mas dakula an katalingkasan sa pagtuyaw sa mga public figures basta may koneksyon ini sa saindang mga katungdan asin bako sa saindang personal na buhay.
Pigpagirumdom kan abogado na mas magabat an padusa sa cyberlibel, na posibleng umabot sa walong taon na pagkapreso asin multa na maabot sa sarong milyon pesos. Inenkaminar an publiko na mag-ingat sa pagpost online asin tulos na itago an mga ebidensya siring kan screenshot enkaso magin biktima nin panraraot.
