Na-recruit si Johannes Natland kan Foxtrot Network, sarong grupo na nagbabayad sa mga jovenes tanganing magsagawa nin karahasan para sa mga kliyente, kaiba an estado kan Iran segun yan sa mga prosecutor kan Britain.
Nahahampang siya sa kasong conspiracy to murder asin sinentensiyahan kan Hulyo. Dai suboot sinabi saiya an pagkakabistuhan kan tawo na gagadanon karibay kan bayad na 270,000 Norwegian kroner, o poco mas o menos $28,600.
Kaka-18 pa sana si Natland kan magbiyahe siya haling Norway pasiring Britain matapos magsimbag sa sarong online advertisement na nag-aalok nin bayad sa paggadan asin nagsasabing “nothing can go wrong”.
Inako kaini na igwa ining semi-automatic pistol, revolver asin mga bala, alagad pinahimutikan an sabwatan sa paggadan. Sinabi kaini na mayo siyang intensyon na ipadagos an plano asin naisip pa niyang badilon an sadiri sa bitis tanganing makaluwas sa sitwasyon.
Mientrastanto, sinabi kan mga prosecutor na masigasig siyang nagbali sa plano asin ipinagyabang sa sarong amigo na “it will be cool to kill someone”.
Sa paghatol sa Woolwich Crown Court sa London, sinabi ni Judge Bobbie Cheema-Grubb na kumbinsido siya na naisakatuparan kuta ni Natland an paggadan kun dai siya naaresto kan pulisya. Sinabi man kan hukom na bako ining padalus-dalos na gibo, kundi sarong plano na nagpahiling nin katuyuhan asin pagpupursige. Kailangan magserbi si Natland nin dai mababa sa 13 taon sa kustodiya.
Segun sa saiyang Norwegian lawyer na si Farid Bouras, sisikapon ninda na mailipat si Natland sa Norway sa pinakamadaling panahon.
Sinabi man ni Commander Helen Flanagan, pamayo kan Counter Terrorism Policing London, na mayo nin ebidensiya na igwa nin direktang koneksyon an kaso ni Natland sa Iran. Mientrastanto, magsirbi suboot ini bilang patanid sa mga jovenes na posibleng marekrut online tanganing gamiton sa mga krimen.
