NAKAMIT na an kalayaan kan Pilipinas sa pananakop kan mga dayuhan magpoon pa kan Huyo 12, 1898 asin hasta sa presente, tinatamasa kan mga Pilipino an katalingkasan.
Sa intrevista kan Bombo Radyo Naga ki Prof. Kenjie Jimenea- Dean-Student and Alumni Affairs/ Program Head -AB Political Science-UNC, nagkaigwa nin kalayaan an mga pilipinong magpili asin magsagibo nin mga bagay na sa hiling kan lambang pinoy makakatabang sa pagpauswag kan lambang pamilya, komunidad asin kan bilog na nasyon.
Dai na kontrolado kan mga dayuhan an Pilipinas huli ta igwa na ini nin sadiring gobyerno asin sadiring mga batas. Dagdag pa kan professor na sa presente igwa nin mga manlain-lain na pwersa na nagiging huma sa siento porsientong katalingkasan kan mga Pilipino.
Mientrastanto, sa ibong kan kalayaan na igwa an Pilipinas, kadakol pa man giraray kamawotan an lambang pinoy orog na pag-abot sa pagtios, kurapsyon asin sigalot sa pag-ultanan kan mga pulitiko. Sigon pa sa Professor, pag-abot man sa West Philippine Sea, padagos man giraray na nakikipaglaban an Pilipinas kontra sa mapang-abusong mga Tsino.
Igwa ng desisyon an International Tribunal na nagsasabing teritoryo kan Pilipinas an West Philippine Sea rason kan paninindugan kan Pilipinas na ipaglaban an soberanya kan nasyon tanganing maibitaran na makontrol kan mga dayuhan an mga pilipino.
Haloy ng panahon na yaun an kamawotan kan lambang Pilipino na makahawas sa pagtios. Huli digdi an pagtios sarong rason kan pagiging kapot sa liog kan mga pulitiko na nagiging dahilan kan kawaran nin kalayaan kan nagkapirang indibidwal tanganing makapagpili kan mga tamang tawo na masirbeng opisyales kan Pilipinas.
