Maluwas an Department of Labor and Employment (DOLE) nin apat na labor advisory sa Nobyembre tanganing protektaran an mga trabahador kontra sa grabeng init na nilalaomang kawsa kan El Niño.
Segun ki DOLE Secretary Francis Tolentino, kabali sa mga pangenot na tututukan iyo an mga trabahador na pirming nakabalad sa saldang.
Saro sa mga planong lakdang iyo an pagtao nin maninigong benepisyo sa paagi kan Employees’ Compensation Commission (ECC) sa mga trabahador na magkakahelang huli sa grabeng init mantang ginigibo an saindang trabaho. Sakop kaini an mga kwalipikadong trabahador sa pribado asin pampublikong sektor.
Sinasapinal man kan departamento an mga panuntunan na may koneksyon sa heat index, kaiba an posibleng pagsuspinde nin trabaho kun umabot sa peligroso na lebel an temperatura.
Katakod digdi, makikipagpulong an DOLE sa mga kumpanya, organisasyon, asin representante kan mga delivery riders asin platform drivers tanganing pag-ulayan an posibleng pagluwag kan saindang trabaho poon alas-dose nin udto sagkod alas-tres nin hapon, kun nuarin grabe an init kan saldang.
Kabali man sa mga planong advisory an pagsulot nin komportable alagad disente kasulotan sa trabaho asin an pagimplementar nin staggered working hours o pagbabago sa oras nin paglaog asin pag-uli kan mga trabahador.
Pigsierto ni Tolentino na paghihinguahon na mailuwas an apat na advisory sa Nobyembre. Naglalaom man an kalihim na makikipagtabangan an mga employer sa pagimplementar kan mga lakdang para sa kasalbaran asin salud kan saindang mga trabahador.
