Nagkaigwa nin deadlock sa pagultanan kan Senado asin Kamara de Representantes segun ki Senator Erwin Tulfo sa proposal na gibohon na permanente an programa kan Department of Social Welfare and Development Assistance to Individuals in Crisis Situations (AICS).
Sinabi ni Tulfo na may mga kongresista na nagsayuma na magpirma sa bersyon kan Senado huli sa “anti-epal provision,” na nagbabawal sa mga pulitiko asin opisyales kan gobyerno na direktang makisumaro sa pagdistribwir nin ayuda.
Segun sa senador, an katuyuhan kan probisyon na ini iyo na maibitaran an paggamit kan ayuda para sa political purposes, lalo na sa panahon nin pirilian. Sinabi pa kaini na an pagdistribuir kan AICS dapat sana kan DSWD asin bako kan mga pulitiko.
Huli sa dae pagkakaoroyon kan duwang kamara, piglalaoman na pag-uulayan giraray an bill sa bicameral conference committee ngani na magkaigwa nin kasunduan sa pinal na bersyon kan AICS bill.
An AICS sarong programa na nagtatao nin tabang pinansyal sa mga indibidwal na nakakaeksperyensya nin krisis, kaiba an mga gastos sa medisina asin iba pang tulos na pangangaipo.
