Pigtawan duon kan sarong eksperto sa ley na an Republic Act No. 10175 o an Cybercrime Prevention Act of 2012 sakop an manlaen-laen na klase nin krimen na may relasyon sa teknolohiya, kabali an cyber libel, illegal access o hacking, identity theft, online scam, cybersex, asin computer-related forgery.
Sa intrevista kan Bombo Radyo Naga ki Atty. Abelardo C. Quilaton Jr. Abogado, saiyang ipinaliwanag na mas magabat an padusa sa cyber libel kisa sa ordinaryong libelo huli ta ginigibo ini sa paagi kan internet o social media, kun kaya an padusa pigkokonsiderar na mas halangkaw an lebel kisa sa nakasurat sa Revised Penal Code.
Pig-eksplikar man kaini na sa mga kaso nin hacking, an primary perpetrator iyo an hacker asin bako an tunay na kagsadiri kan account, kun mapapatunayan na nakompromiso an nasabing account. Alagad, an sarong tawo pwede pa man giraray na manimbag sa paghiras o pag-repost nin nakakaraot na laog kun igwa ining mga malisyosong pahayag o pwedeng patunayan na igwa nin intensyon na danyaran an iba.
Mientrastanto, piglinaw na base sa desisyon kan Korte Suprema kan taon 2023, nagtetenir na sarong taon an prescriptive period o deadline sa pagsangat nin kaso sa cyber libel, kapareho kan ordinaryong libel. Nasambit man na saro sa pinakadakulang agyat sa pag-prosecutar kan mga kaso na may relasyon sa cybercrime iyo an pagpapatunay kan authenticity asin integridad kan electronic evidence, nin huli ta kulang an sarong simpleng screenshot bilang ebidensya sa korte.
Segun sa eksperto, apat na importanteng elemento an kaipuhan na patunayan tanganing magkaigwa nin cyber libel: igwa nin defamatory statement, igwa nin malinaw na pagsambit sa sarong tawo, ini isinapubliko o nahiling kan ibang tawo sa internet, asin igwa nin malisya o maraot na intensyon sa parte kan publisher. Dugang pa, an opinyon puede sanang magin depensa kun iyan makatanosan, igwa nin supisyenteng basehan, asin may koneksion sa sarong bagay na interes kan publiko.
Bilang pagirumdom sa publiko, pig-enkaminar an mga internet users na tulos na ireport sa mga nanonongdan na awtoridad an anuman na insidente nin hacking o online scam, baguhon an password kan saindang account, asin itago an importanteng electronic records bilang ebidensya. Pigduon man an importansya kan pagiging responsable sa paggamit kan social media sa paagi kan pagpraktis kan prinsipyong “Think Before You Click” tanganing maibitaran an pagbalga kan ley asin mamantenir an ligtas na paggamit kan teknolohiya.
