Ipinahayag kan sarong abogado an legal asin political na implikasyon kan kasong plunder na kinakahampang ni Senador Rodante Marcoleta, kaiba na an posibleng epekto kaini sa maabot na impeachment trial ni Bise Presidente Sara Duterte.
Sa intrevista kan Bombo Radyo Naga kay Atty. Jerico Angelo P. Galvez (Election Lawyer), sinabi kaini na dawa i ginagarantiyahan kan Konstitusyon an derechos sa matoninong na pagtiripon, an “surprise rally” na ginibo kan Iglesia ni Cristo nagcausa nin inconvenience sa publiko huli sa mahibog na trapiko, alagad nagserbi man ining paagi para maipaluwas ninda an saindang sentimiento contra sa gobyerno.
Ipinaliwanag ni Galvez na sa irarom kan Republic Act No. 7080 o an Anti-Plunder Law, pwedeng kasuhan nin plunder an sarong opisyal kan gobyerno kun mapatunayan na nakatipon ini nin dai mababa sa ₱50 million na ill-gotten wealth. Bako sana suboot an sakop kan ley an pag-agaw nin pondo kan publiko kundi maging an pag-ako nin regalo o suhol mantang nasa pwesto.
Segun ki Galvez, nag-ugat an kaso kontra ki Marcoleta sa soboot pag-admitir kaini na nag-ako siya nin poco mas o menos ₱75 million kan siya kongresista pa. Dawa ngani nanindugan an senador na an kantidad iyo an mga donasyon sa kampanya na naresibe bago an opisyal na panahon kan kampanya, pigbabareta na pig-eeksamin kan Ombudsman kun pwede ining ikonsiderar na ill-gotten wealth, urog na kun dae ini pigdeklarar nin tama sa saiyang Statement of Assets, Liabilities and Net Worth (SALN).
Pigduon man ni Galvez an kahalagahan kan pantay-pantay na pagpapautob kan ley tanganing maibitaran an inaapod na “selective justice.” Kaipuhan suboot na ipaheling kan gobyerno na bako ining selective sa pagsangat nin kaso kontra sa mga opisyales na pigtutubudan nin kurapsyon, ano man an saindang partido o afiliasyon sa administrasyon.
Mientrastanto, sinabi ni Galvez na posibleng makaapektar sa kaso ni Marcoleta an impeachment trial ni Bise Presidente Sara Duterte, urog na sa bagay dapit sa bilang kan mga senador na pwedeng magpartisipar bilang senador-huwes. Dugang pa kaini na nakadepende bako sana sa ebidensya an resulta kan impeachment kundi maging sa interpretasyon kan senado sa ley asin sentimento kan publiko.
